Դեկտեմբերի 27-ին Խնկո Ապոր անվան ազգային մանկական գրադարանի դահլիճը լի էր մանուկներով. Երևանի թիվ 108 միջնակարգ դպրոցի առաջին դասարանի սաներն իրենց հասակակիցների համար թատերական ներկայացում ցուցադրեցին: Բեմին էին երեխաների կողմից սիրված հեքիաթների հերոսները: Ամանորյա երգ ու պարի, հանելուկների ուղեկցությամբ ներկայացման հերոսները փորձում էին «ավազակների» ձեռքից ազատել Ձյունանուշին՝ տոնական հրաշքը կյանքի կոչելու համար: Իսկ Ձյունանուշին ազատ արձակելու նախապայմանը մեկն էր՝ փոխանակել նրան Ձմեռ պապի ամանորյա նվերների պարկի հետ: Ի վերջո պայքարն ավարտվեց համերաշխության հաստատմամբ՝ «ավազակներին» մասնակից դարձնելով ամանորյա տոնական միջոցառմանը:
Ցերեկույթի ավարտին դահլիճում հավաքված երեխաներին շնորհավորեցին Ձմեռ պապն ու Ձյունանուշը՝ մաղթելով նրանց անհոգ ու առողջ մանկություն, խոհեմություն, անսահման ջերմությամբ ու հոգատարությամբ լի միջավայր, սեր գիտելիքների և ընթերցանության նկատմամբ:
