Ավարտվեց Խնկո Ապոր անվան ազգային մանկական գրադարանում IBBY Armenia մշակութային ՀԿ-ի հետ համագործակցությամբ անցկացվող «Գրքերի ապահով աշխարհում» եռօրյա վերապատրաստման դասընթացը։
Դասընթացի վերջին օրը մասնակիցները շարունակեցին ուսումնասիրել գրքի և ընթերցանության կիրառման տարբեր մեթոդներ՝ երեխաների հուզական և հոգեբանական տարբեր իրավիճակներին ճիշտ արձագանքելու նպատակով։
Օրվա ընթացքում անդրադարձ եղավ տեսողական և լսողական ընթերցանությանը, դրանց առանձնահատկություններին։
Մասնակիցները քննարկեցին նաև գիրքը որպես աջակցող միջոց օգտագործելու գաղափարը։ Ինչպես ընդգծեց բանախոս Էլլա Բերթհուդը՝ «գիրքը կարող ենք օգտագործել որպես սպեղանի»․ այն երեխայի հույզերին, ապրումներին ու դժվարություններին անդրադառնալու լավագույն միջոցն է։
Անդրադարձ կատարվեց նաև գրաֆիկական վեպերին։ Սահիկաշարի միջոցով Էլլա Բերթաուդը ներկայացրեց տարբեր օրինակներ, որոնք կարող են կիրառվել տարբեր հոգեվիճակում գտնվող երեխաների հետ աշխատանքում։
Գործնական հատվածում մասնակիցները խմբային ընթերցանությամբ հեքիաթ կարդացին, գրքերի մասին մտքերով փոխանակվեցին։ Բանախոսը ևս մեկ անգամ ներկայացրեց բիբլիոթերապիայի կիրառական մեթոդներն ու երեխաների հետ աշխատելու արդյունավետ մոտեցումները։
Դասընթացի ավարտին գրող Էլլա Բերթհուդը գրքեր նվիրեց գրադարանին, ապա շնորհակալագիր ստացավ IBBY Armenia-ի նախագահ, Խնկո Ապոր անվան ազգային մանկական գրադարանի տնօրեն Ռուզան Տոնոյանից՝ համագործակցության և դասընթացի շրջանակում ունեցած ներդրման համար։
Դասընթացի մասնակիցներին հանձնվեցին վկայականներ։
