Խնկո Ապոր անվան ազգային մանկական գրադարանում ավարտվեց ևս մեկ եռօրյա վերապատրաստման դասընթացը։ Այս անգամ գրադարանը հյուրընկալել էր Վայոց Ձորի մարզի դպրոցական գրադարանավարներին։
Դասընթացն անցավ հետաքրքիր և հագեցած։ Մասնակիցները տեսական և պրակտիկ գիտելիքներ ստացան գրադարանային ֆոնդի համալրման և մշակման գործընթացների մասին, սովորեցին գրականության գրանցման ու հաշվառման կարգը, իմացան, թե ինչպես է պետք կազմակերպել գրացուցակները, ինչպես նաև ծանոթացան գրադարանի էլեկտրոնային տեղեկատվական աշխատանքներին։
Գրադարանավարները մեծ հետաքրքրությամբ ծանոթացան ընթերցողների սպասարկման կազմակերպման առանձնահատկություններին, քննարկեցին դպրոցական գրադարանների և ուսուցչական կազմի համագործակցության կարևորությունը։ Ծանոթացան մեթոդական ձեռնարկներին և ուղեցույցներին, քարտային, էլեկտրոնային և այյբենական քարտարաններին։ Բանախոսի հետ քննարկեցին սոցիալական ցանցերի կիրառումը։
Եղավ նաև փորձի փոխանակումը «Շիրակացու ճեմարան» միջազգային գիտակրթական համալիրի գրադարանի ղեկավարի հետ, դասընթացի ընթացքում մասնակիցներն ունեցան գործնական աշխատանքներ, հարց ու պատասխաններ, ինտերակտիվ քննարկումներ:
Գրադարանավարները ձեռք բերեցին կարևոր գիտելիքներ, որոնք աշխատանքը կդարձնեն ավելի արդյունավետ։
Դասընթացի ավարտին մասնակիցներին հանձնվեցին վկայականներ։
