Ինչ ուղղությամբ է այսօր զարգանում գրադարանային համակարգը, թվայնացման ինչ տեխնոլոգիաներ են կիրառում աշխարհի ամենատարբեր գրադարաններն ու ինչպիսին է իրավիճակը Հայաստանում: Այս և այլ հարցերի շուրջ խոսվեց ապրիլի 18-ին Ազգային գրադարանային շաբաթի շրջանակում Խնկո Ապոր անվան ազգային մանկական գրադարանում «Թվայնացում, արհեստական բանականություն, մեծ տվյալներ.
գրադարանները նոր մարտահրավերներին ընդառաջ» թեմայով վարպետության դասի ժամանակ: Գրադարանի աշխատակիցների համար դասը վարեց ՀՀ ԳԱԱ Հիմնարար գիտական գրադարանի գիտական ղեկավար Տիգրան Զարգարյանը:
Տիգրան Զարգարյանի խոսքով՝ հայկական գրադարանները պետք է ջանքեր գործադրեն ոլորտային զարգացումների հետևից հասնելու համար: «Սակայն խնդիրն այն է, որ հայատառ բովանդակությունը այնքան էլ լավ ներկայացված չէ, ինչի պատճառով տեղեկատվության մի մասը կորում է կամ հասանելի չէ շահագրգիռ լսարանի համար: Այս առումով կարևորվում է ժամանակակից գրադարանավարի դերը թվային գրադարաններ ձևավորելու աշխատանքներում»,- նշեց նա:
Տիգրան Զարգարյանն իր դասախոսության ընթացքում անդրադարձավ թվանշային գրադարանների զարգացման
փուլային պատմությանը: Խոսելով ավանդական գրադարանների համեմատ առավելությունների մասին՝ նշեց, որ թվանշային գրադարաններում առկա տեղեկատվությունը ընթերցող հանրության համար հասանելիության ավելի լայն շրջանակ ունի:
Նրա խոսքով՝ հայատառ բովանդակության ստեղծման համար գրադարանավարները պետք է ծրագրավորման նվազագույն հմտություններ ունենան: «Անհրաժեշտ են նոր որակի գրադարանավարներ՝ ավելի ճկուն, նորարար, տեղեկատվական շտեմարաններից օգտվելու կարողություններ ունեցող: Չպետք է մոռանալ, որ թվանշային գրադարանները շատ լավ հարթակ են տեղեկատվական պատերազմ վարելու համար»,- ասաց Տիգրան Զարգարյանը: Նա նշեց, որ թվային անվտանգության, ռոբոտիզացիայի արդյունքում ձևափոխվում է նաև աշխատանքային շուկան, սակայն Հայաստանում դեռևս այդ ոլորտում առկա են մի շարք օրենսդրական բացեր:
