Հայկական գրադարանային ասոցիացիան ապրիլի 15-22-ը Հայաստանում կանցկացնի «Ազգային գրադարանային շաբաթ» ծրագիրը` «Գրադարանը նորարարության հարթակ» խորագրի ներքո:
Այս տարի ընտրված խորագիրը միտված է արժևորելու գրադարանների դերը որպես մշակութային, նորարական և սոցիալական հարթակ:
Հայկական գրադարանային ասոցիացիան այս նախաձեռնությունն անցկացնում է 2002 թվականից: Ծրագրի նպատակն է կարևորել գրքի և գրադարանների դերն ու նշանակությունը հասարակության զարգացման գործում:
Շաբաթի շրջանակում Երևանի ու մարզերի գրադարաններում կիրականացվեն բազմաբնույթ միջոցառումներ` միտված գրադարանային ոլորտին առնչվող հիմնահարցերի շեշտադրմանը, գրադարանների միջև փորձի փոխանակմանը, գրքի և ընթերցանության դերի բարձրացմանն ու ընթերցող-գրադարան կապի ամրապնդմանը:
Այս օրերին հանրապետության գրադարաններում կանցկացվեն հանդիպումներ, գրքերի քննարկումներ, շնորհանդեսներ, վարպետության դասեր, դասախոսություններ, ճանաչողական փոխայցելություններ, ցուցահանդեսներ, կլոր-սեղան քննարկումներ` Հայաստանի հրատարակչությունների ներկայացուցիչների ու գրադարանավարների մասնակցությամբ:
«Ազգային գրադարանային շաբաթը» կամփոփվի ապրիլի 22-ին:
