«Ազգային գրադարանային շաբաթ» ծրագրի շրջանակում Խնկո Ապոր անվան ազգային մանկական գրադարանում կազմակերպվել է դասախոսություն՝ Ազգային մանկական, համայնքային և մասնագիտական գրադարանների գրադարանավարների համար։
«Գրադարանների դերակատարումը կրթության գործընթացում» թեմայով դասախոսությունը վարել է Հայ-ռուսական համալսարանի դասախոս Հովհաննես Հովակիմյանը։
Որպես ներածական նյութ, բանախոսը անդրադարձ է կատարել «գրադարան» հասկացությանը, արդի գրադարանների նշանակությանը, գործառույթներին, Հայաստանում և աշխարհում գրադարանային գործի արդի միտումներին։
Դասախոսության ընթացքում Հովհաննես Հովակիմյանը խոսել է ի սկզբանե ստեղծված գրադարանների, որպես կրթօջախ դրանց դերի, հոգևոր գրականության ստեղծման, պահպանության, տարածման, հանրահռչակման կարևորության մասին։ Պատմական էքսկուրս է կատարվել Հայաստանում վանական մեծ համալիրներում ստեղծված առաջին գրադարաններին, որոնց ծագումն ի սկզբանե փոխկապակցված է եկել կրթական գործընթացների հետ։
Դասախոսության ընթացքում շեշտադրվել են արդի գրադարանների, գրադարանավարների դերակատարումները ժամանակակից ընթերցողի պահանջների, ընթերցվող գրականության պահանջարկի համատեքստում։ Խոսելով տարբեր ժամանակներում գրադարանների ազդեցության մասին, Հովհաննես Հովակիմյանը մատնանշել է այն ուղիները, որոնք ամրապնդում են գրադարան-ընթերցող կապը՝ որպես արդյունք մեծացնելով կրթական բաղադրիչը։
Դասախոսությունն ամփոփվել է թեմային առնչվող քննարկումով։
