Դեկտեմբերի 3-5-ը Մոսկվայում անցկացվել է ԱՊՀ երկրների մանկապատանեկան գրքի երրորդ միջազգային համաժողովը, որն իրականացվել է «Մանկական գրականության լեզվով՝ համագործակցություն մանկական գրականության և ընթերցանության ոլորտում» խորագրով։ Թեման էր՝ «Ժողովրդական բանահյուսությունը երիտասարդ ընթերցողի դաստիարակության հիմք. ծրագրեր, համագործակցության հեռանկարներ ԱՊՀ երկրների համար»։
Համաժողովը համախմբել էր մանկական գրականության, գրադարանային և կրթամշակութային ոլորտների մասնագետներին։
Մասնակիցները հանդես են եկել զեկույցներով, որտեղ ներկայացվել են նոր ծրագրեր, փորձառություններ և նախաձեռնություններ՝ ուղղված մանկական գրականության զարգացմանն ու երիտասարդ ընթերցողների խրախուսմանը։
Համաժողովին մասնակցել և զեկույցներով հանդես են եկել Խնկո Ապոր անվան ազգային մանկական գրադարանի սպասարկման գծով փոխտնօրեն Ռուզան Թելունցը «Բանահյուսությունը որպես ընթերցանության ուսուցման հիմք. Խնկո Ապոր անվան ազգային մանկական գրադարանի փորձը» թեմայով, և գրադարանի ն/դ-4րդ դաս. սպասարկման ենթաբաժնի վարիչ, Մանկապատանեկան գրքի միջազգային կոմիտեի (IBBY) հայաստանյան մասնաճյուղի ծրագրերի ղեկավար Կարինե Հովհաննիսյանը՝ «Բանահյուսությունը և ժամանակակից մանկական ընթերցանությունը. IBBY Armenia-ի փորձը եւ նախաձեռնությունները» թեմայով։
Համաժողովի ընթացքում կազմակերպվել է շրջայց Ռուսաստանի պետական մանկական գրադարանում և «ЗНАЙЧИТАЙ» մանկական ինտելեկտուալ կենտրոնում։
Համաժողովը դարձել է արժեքավոր հարթակ ԱՊՀ երկրների միջև մասնագիտական կապերի ընդլայնման, փորձի փոխանակման և նոր նախաձեռնությունների մեկնարկի համար՝ նպաստելով երիտասարդ ընթերցողների մշակութային կրթության ամրապնդմանը։
