Խնկո Ապոր անվան ազգային մանկական գրադարանում ավարտվեց գրադարանավարների համար նախատեսված մեդիագրագիտության եռօրյա վարպետության դասը։
Դասընթացը վարում էր «Մեդիա հանուն կրթության» ՀԿ նախագահ, mediaforedu.am կայքի խմբագիր Անուշ Մարտիրոսյանը։ Դասընթացի ընթացքում քննարկվել են գրադարանների դերը համայնքային կյանքում և մեդիագրագիտության զարգացման գործում։
Մասնակիցներն անդրադարձել են տեղեկատվության ստուգմանն ու առաջնային աղբյուրներին վստահելու կարևորությանը, փաստարկված տեղեկատվության տարածմանը, էթիկայի կանոնների պահպանմանը, ինչպես նաև անձնական տվյալների պաշտպանությանն ու թվային անվտանգությանը։
Խմբային և գործնական աշխատանքների միջոցով քննարկվել է նաև, թե ինչպիսին պետք է լինի հավաստի լուրը, ինչպես գտնել տեղեկատվական սխալները, ստուգել աղբյուրները։
Դասընթացի ընթացքում կարևորվեց նաև գրադարանների դերը՝ որպես մեդիագրագիտության և վստահելի տեղեկատվության տարածման կարևոր օրրան։
