Սեպտեմբերի 1-ին Գիտելիքի և դպրության օրվա կապակցությամբ Խնկո Ապոր անվան ազգային մանկական գրադարան էր այցելել Կրթության, գիտության, մշակույթի և սպորտի նախարարի տեղակալ Դանիել Դանիելյանը: Գրադարանի փոքրիկ հյուրերի հետ հեքիաթի սրահում «Անտառային դասեր» ինտերակտիվ տիկնիկային ներկայացումը դիտելուց հետո՝ փոխնախարարը շնորհավորեց դպրոցականներին նոր ուսումնական տարվա մեկնարկի առթիվ՝ մաղթելով նրանց լավ սովորել ու սիրել գիրքը:
Դանիել Դանիելյանը երեխաներին պատմեց, որ տարիներ առաջ ինքը նույնպես գալիս էր այս գրադարան, գրքեր վերցնում և դրական հիշողություններ ունի գրադարանում ստացած իր գիտելիքների հետ կապված: «Տարիներ հետո ես կարծես վերադարձել եմ իմ տուն՝ հարազատ ինձ վայր: Գրադարանը կենդանի մի կենտրոն է, որտեղ ամեն ինչ կա, դրանով էլ տանում ես երեխաներին դեպի գիրքն ու ընթերցանությունը: Առանց գրքի արվեստ ու կրթություն գոյություն չունի: Գիտելիքները սկսում են գրադարանից»,- ընդգծեց նա:
Կարևորելով մանկապատանեկան գրադարանների դերը երեխաների կրթության գործում՝ փոխնախարարն ընդգծեց, որ անհրաժեշտ է ուշադրություն դարձնել Հայաստանի մարզերում համայնքային գրադարաններում մանկապատանեկան գրականության համալրմանը: «Գրքերը բավական մաշված են, քանակն էլ՝ խիստ սակավ», — իր մտահոգության մասին կիսվեց նա:
Այնուհետ Դանիել Դանիելյանը գրադարանի տնօրեն Ռուզան Տոնոյանի հետ շրջայց կատարեց սրահներում՝ ծանոթանալով գրադարանի աշխատանքներին, խոսեց գրադարան այցելած ընթերցողների հետ՝ հետաքրքրվելով, թե ինչպիսի գրականություն են նախընտրում կարդալ:
