Սեպտեմբերի 6-ին Խնկո Ապոր անվան ազգային մանկական գրադարանում ՀՀ-ում Իրանի Իսլամական Հանրապետության դեսպանության մշակույթի կենտրոնի հովանավորությամբ տեղի է ունեցել հանդիպում իրանցի ճանաչված մանկագիր Ահմադ Աքբարփուրի հետ, ով հանդես է եկել «Գրականության դերը մանուկների և դեռահասների կյանքում» թեմայով բանախոսությամբ։
Ահմադ Աքբարփուրի գրքերը լայնորեն ճանաչված են ամբողջ աշխարհում, թարգմանվել են աշխարհի տարբեր լեզուներով, լավագույնն են ճանաչվել տարբեր միջազգային մրցույթների ժամանակ։
Բանախոսության ընթացքում հեղինակը հայ ընթերցողների հետ խոսել է գրականության կարեւորության մասին, այն ազդեցության մասին, որը գրականությունը թողնում է պատանիների զարգացման, աշխարհընկալման ձեւավորման վրա։
Հանդիպմանը ներկա էր նաեւ ԻԻՀ դեսպանատան մշակութային հարցերով խորհրդական պարոն Մոհամմադ Ասադի Մովահեդը, ով իր շնորհակալական խոսքն ասաց հայ ընթերցողին եւ Խնկո Ապոր անվան գրադարանի տնօրենին, աշխատակազմին՝ մշտապես սերտ համագործակցության համար։ Ներկա էր նաեւ «Գրքի տուն» հրատարակչության տնօրենը, ով Խնկո Ապոր անվան ազգային մանկական գրադարանին գրքեր նվիրեց։
Հանդիպումն ավարտվեց ընթերցասերների եւ գրողի հարց ու պատասխանով։
