Օգոստոսի 4-ին Խնկո Ապոր անվան ազգային մանկական գրադարանի և IBBY Հայաստանի համագործակցությամբ Իրանական ընթերցասրահում անցկացվեց նկարազարդման վարպետության դաս, որը վարեց իրանցի գրող և նկարազարդող Հոդա Հադդադին։
Դասընթացի ընթացքում Հադդադին մասնակիցներին ներկայացրեց իր ստեղծագործական ուղին՝ ցուցադրելով գրքերում տեղ գտած նկարազարդումների բնօրինակները և կոլաժային աշխատանքները։ Սահադիտման միջոցով ցուցադրվեց նաև նրա կենսագրական հոլովակը։
Վարպետության դասի թեման ընտրվել էր «Կարմիր գլխարկ» հեքիաթը։ Մասնակիցները, օգտագործելով ամսագրեր, թերթեր և գունավոր թղթեր, ստեղծեցին հեքիաթի իրենց հեղինակային տարբերակը։ Հադդադին ներկայացրեց հեքիաթի տարբեր տարբերակների բովանդակային առանձնահատկությունները և խոսեց դրանց նշանակության մասին։
Նա կիսվեց իր փորձով, տեխնիկայով և մոտեցումներով, ոգեշնչելով թե՛ սկսնակ, թե՛ արդեն ստեղծագործող մասնակիցներին։ Շատերի համար կոլաժային աշխատանքը նոր փորձ էր, որը մեծ հետաքրքրություն առաջացրեց։
Մասնակիցները բարձր գնահատեցին վարպետության դասը և հայտնեցին ցանկություն՝ նման հանդիպումներն ավելի հաճախակի դարձնելու:
