Հունիսի 1-ին Խնկո Ապոր անվան ազգային մանկական գրադարանը հյուրընկալեց տասնյակ մանուկների՝ միասին տոնելու Երեխաների պաշտպանության միջազգային օրը:
Գրադարանի բակում Ներքին գործերի նախարարության (ՆԳՆ) Ոստիկանության մշակույթի կենտրոնի հետ համատեղ երեխաների համար կազմակերպվեցին խաղեր, պարային ֆլեշմոբեր, կավճանկարչություն, երեխաներն անակնկալ նվերներ ստացան: Մանուկների համար երաժշտական համարներով հանդես եկան ՆԳՆ Ոստիկանության զորքերի երգչախումբն ու ՆԳՆ Ոստիկանության զորքերի նվագախումբը՝ «ՍՕՍ-Մանկական Գյուղեր» հայկական բարեգործական հիմնադրամի շահառուների մասնակցությամբ:
Գրադարանի դահլիճում Երևանի Վ. Բելինսկու անվան թիվ 38 դպրոցի սաների (մանկավարժ՝ ՇուշանիկԳրիգորյան) հետ համատեղ կազմակերպված ցերեկույթի ընթացքում դպրոցականները հայրենիքն ու մայրիկներին գովերգող բանաստեղծություններով ու երգերով, խաղաղության մասին կոչերով հանդես եկան: Փոքրիկ բեմադրության միջոցով կարևորվեց օրվա խորհուրդը բանիմաց ու պահանջատեր սերունդ ունենալու տեսանկյունից:
Գրադարանի ճեմասրահում փոքրիկ հյուրերի համար կազմակերպված ցերեկույթի ընթացքում պարային համարներով ելույթ ունեցան «Կարապետյանների պարի և պլաստիկայի ցուցադրական դպրոցի» սաները (գեղարվեստական ղեկավարներ՝ Արտաշես Կարապետյան և Լիանա Սարգսյան): Երաժշտական կատարումներով հանդես եկավ Ալեքսանդր Սպենդիարյանի անվան երաժշտական դպրոցի սան Ստեփան Աղբալյանը (ուսուցիչ՝ Դավիթ Նալչաջյան):
