Հոկտեմբերի 7-ին Հայաստանում նշվում է Գրադարանավարի օրը: Տոնի առթիվ Խնկո Ապոր անվան ազգային մանկական գրադարանում կազմակերպվել էր ցերեկույթ, որի ընթացքում գրադարանի թատերական խմբակի սաները ցուցադրեցին «Տոնդ շնորհավոր, սիրելի գրադարանավար» ներկայացումը՝ երախտիքի և մեծարման խոսքեր հղելով գրադարանավարներին: Այնուհետև երաժշտական կատարումներով հանդես եկան գրադարանի ընթերցող երեխաները, ովքեր սովորում են Երևանի Չայկովսկու անվան երաժշտական դպրոցում:
Գրադարանավարներին շնորհավորական խոսք է հղել Խնկո Ապոր անվան ազգային մանկական գրադարանի տնօրեն Ռուզան Տոնոյանը, մաղթելով քաջառողջություն, ուժ, եռանդ գրադարանը բովանդակությամբ լցնելու համար:
Հայկական գրադարանային ասոցիացիայի փոխնախագահ Ռաֆիկ Ղազարյանը ևս շնորհավորել է միջոցառման մասնակիցներին՝ մաղթելով բեղմնավոր աշխատանք:
Գրադարանավարի օրվա կապակցությամբ Ռուզան Տոնոյանը շնորհակալագրեր և պատվոգրեր է հանձնել Խնկո Ապոր անվան ազգային մանկական գրադարանի աշխատակիցներին: Գրադարանավարները պարգևատրվել են նաև ԿԳՄՍ-ի կողմից:
Ցերեկույթի վերջում մասնակիցները փոքրիկ տեսաֆիլմ են դիտել, որտեղ գրադարանավարներից յուրաքանչյուրը պատմում է գրադարանավարի մասնագիտությունն ընտրելու իր պատմությունը:
